Klassík í Vatnsmýrinni – Unaðstónar frá ýmsum löndum

Klassík í Vatnsmýrinni – Unaðstónar frá ýmsum löndum

Klassík í Vatnsmýrinni - Unaðstónar frá ýmsum löndum

Tónleikar í Norræna húsinu 21. mars kl. 20

Tríó Túnfífill, skipað þeim Maríu Konráðsdóttur, sópran, Erlu Dóru Vogler mezzósópran og Svani Vilbergssyni gítarleikara flytur tónlist eftir John Dowland, Franz Schubert, Ferenc Farkas, Anatoly Malukoff, Federico Carcia Lorca og Manuel de Falla, auk þjóðlagaútsetninga Atla Heimis Sveinssonar. Efnisskráin stillir upp ólíkum menningarheimum og mismunandi tímabilum með samhljóm radda og gítars í forgrunni. María Konráðsdóttir stundaði nám í söng og klarínettuleik við Tónlistarskólann í Reykjavík og stundar nú söngnám á meistarastigi við Tónlistarháskólann í Berlín. Meðal verkefna hennar á tónleikasviðinu má nefna fjölda ljóðatónleika, Jólaóratoríu Bachs, Stabat Mater eftir Pergolesi og Requiem Mozarts. Árið 2015 tók María þátt í alþjóðlegu Giulio Perotti söngkeppninni sem haldin var í Þýskalandi og vann til þriggja verðlauna. Erla Dóra Vogler stundaði söngnám við Tónlistarskóla Austur-Héraðs og Tónlistarskólann í Reykjavík og hélt svo til framhaldsnám við Tónlistarháskóla Vínarborgar.  Hún flutti heim að loknu námi og hefur verið áberandi í tónlistarlífinu síðan. Hún hefur komið fram á einsöngstónleikum og kammertónleikum bæði hér heima og erlendis, t.d. í Listasafni Sigurjóns Ólafssonar, Salnum, Bláu kirkjunni og í Musikverein Wien.  Sumarið 2013 tók hún þátt í listaverkefninu Awakening of the Horsemen í Donegal á Írlandi og haustið 2013 í verkefni í Jersey: Elizabeth Castle Artist Lock In.  Frá 2008 til 2011 var hún styrkþegi og tónlistarmaður á vegum Live Music Now – sjóði Yehudi Menuhins í Austurríki. Árið 2010 kom út fyrsti geisladiskur Erlu Dóru, Víravirki. Svanur Vilbergsson hlaut fyrstu tónlistarmenntun sína við Tónlistarskóla Stöðvarfjarðar og Tónlistarskólann á Egilsstöðum. Hann stundaði framhaldsnám í Englandi, Spáni, Belgíu og Hollandi þar sem hann tók lokapróf frá Konunglega tónlistarháskólanum í den Haag.  Svanur Vilbergsson hefur haldið einleikstónleika víða um heim, m.a. í Bandaríkjunum, Hollandi, Belgíu, Spáni, Englandi, Írlandi, Noregi og Grænlandi. Árið 2011 kom út fyrsti einleiksdiskur Svans, Four Works. Svanur er einn stofndenda og listrænna stjórnenda alþjóðlegu gítarhátíðarinnar Midnight Sun Guitar Festival og er meðlimur í Íslenska Gítartríóinu. AALTO Bistro er opið til kl 21.30 á miðvikudagskvöldum. Aðgangseyrir er kr. 2.500, 1.500 kr. fyrir eldri borgara og öryrkja, ókeypis fyrir nemendur og gesti 20 ára og yngri. Fernir tónleikar í áskrift á kr. 7.500, eða kr. 4.500 fyrir eldri borgara og öryrkja. Miðasala á Tix.is og við innganginn. Klassík í Vatnsmýrinni er tónleikaröð Félags íslenskra tónlistarmanna – klassískrar deildar FÍH í samvinnu við Norræna húsið.

INFORMATION

WHEN

Wed 21 Mar at 20:00
The Nordic House}

VENUE

The Nordic House
Sturlugötu 5
101 Reykjavík

LOCATION